පාකිස්තානය තුළ දැඩි දේශපාලනික අවිනිශ්චිත භාවයක්
සිරගත කර සිටින පාකිස්තානයේ හිටපු අගමැති ඉම්රාන් ඛාන්ගේ ආධාරකරුවන් එරට මැතිවරණයේදී පළමු තැනට පත් වූ පසුබිමක, පාකිස්තානයේ දෙවන සහ තුන්වන දේශපාලන කණ්ඩායම් වන හිටපු අගමැති නවාස් ෂරීෆ්ගේ PMLN සහ බිලාවල් භූතෝ සර්දාරිගේ PPP යන පක්ෂ නිවේදනයක් නිකුත් කරමින් තම කණ්ඩායම් දෙක එක්ව නව රජයක් පිහිටුවීමට කටයුතු කරන බව ප්‍රකාශ කර ඇත.
PMLN හා PPP යන පක්ෂ එලෙස යෝජනා කරන්නේ පාකිස්ථානය තුළ දේශපාලන ස්ථාවරත්වය ගෙන ඒමට බව ද වාර්තා වෙයි. කෙසේ නමුත් ඔවුන් රජයක් පිහිටුවන්නේ නම්, එම පියවර ඉම්රාන් ඛාන් මහතාගේ අනුගාමිකයන් කෝපයට පත් කිරීමට තුඩුදිය හැකි කාරණයක් බව පාකිස්තාන් මෙන්ම ජාත්‍යන්තර දේශපාලන විචාරකයින් පෙන්වා දෙයි.
සිරගතව සිටින හිටපු අගමැති ඉම්රාන් ඛාන්ගේ පීටීඅයි පක්ෂයේ සහාය ලබන ස්වාධීන අපේක්ෂකයින් බ්‍රහස්පතින්දා පැවති මැතිවරණයේදී බොහෝ ආසන ලබා ගත් අතර, ඔවුන්ට පක්ෂයක් පිහිටුවීමට හෝ පවතින පක්ෂයකට හෝ සන්ධානයකට සම්බන්ධ විය හැකිද යන්න පිළිබඳව දැන් ප්‍රශ්න මතුවෙමින් තිබේ.
මේ අතර, හිටපු අගමැති නවාස් ෂරීෆ්ගේ PMLN – ස්වාධීනව පසුව වැඩිම ආසන සංඛ්‍යාවක් දිනාගත් – සහ බිලාවල් භූතෝ සර්දාරිගේ PPP සන්ධාන සාකච්ඡා පවත්වමින් අගමැති කවුද යන්න පිළිබඳව විවිධ මත පළ කරමින් සිටිති.
අගමැති වීමට, ඒ සඳහා ඉදිරිපත් වන අපේක්ෂකයා ඉදිරි සති කිහිපය තුළ සැසිවාරය කැඳවන විට මුළු මන්ත්‍රීවරුන් 336කින් යුත් ජාතික සභාවෙන් ආසන 169ක සරල බහුතරයක් පෙන්විය යුතුය.
විශ්ලේෂකයින් පවසන්නේ ප්‍රචණ්ඩත්ව, විරෝධතා සහ බලවත් හමුදාව විසින් මර්දනය කිරීමේ පසුබිම නිරන්තරයෙන් පවතින පාකිස්තානය තුළ සති ගණනක දේශපාලන අවිනිශ්චිතතාවයක් පැවතිය හැකි බවයි.
Share this NEWS
